Vasco Navarro Trenbidearen Bide Berde osoa egun bakar batean egin daiteke, kilometroak egitea beste helbururik ez baduzu.

Alabaina , aurrera egin ahala aurkituko dituzun eremuetako (Estellerria, Arabako Mendialdea, Gasteiz eta Lautada eta Debagoiena) inguruez eta kulturaz gozatu eta gastronomia oparoa dastatu nahi baduzu, erritmo motelago bat beharko duzu, eta horregatik guk hemen bi egunetan egitea proposatzen dizugu.

LIZARRATIK BERGARA ETA OÑATIRA BI EGUNETAN

123,5 km daude Lizarratik (Nafarroa) Bergara edo Oñatira (Gipuzkoa) bitarte. Eta egun horiek osatzeko, bi eguneko abentura proposatzen dizugu, asteburu batean, Gasteizen gaua emanez, edo bestela bi egun soltetan, bigarren egunean aurreko eguneko helmugatik abiatuz.

Beste proposamenetan bezalaxe, bidea baterako zein besterako noranzkoan egin daiteke, Bergara edo Oñatitik zein Lizarratik alegia, eta azken hori proposatu nahi dizugu lerro hauetatik, Vasco Navarro Trenbidearen Bide berdeko 0 kilometrotik abia zaitezen.

Lehen egunerako proposatzen dizugu lehen 76 kilometroak egitea, Lizarratik Euskadiko hiribururaino, hain zuzen.

Lizarratik abiatu eta Zubielkirako bidea hartuko dugu, Estellerriko herri lasaietan barrena, Zufian, Murietan eta Antzinen barrena zehazkiago, non geldialdiak egiteko eta eskualdeko baratze oparoko askotariko produktuak dastatzeko aukera izango dugun.

Jarrai ezazu aurrera Acedoraino, oraindik Estellerrian, eta herri horretara iristean, Arquijasko tuneletik (1.415 m) hurbil egongo zara jada, baita Arquijasko Biaduktu ikusgarritik hurbil ere.

Jarraian, segi jatorrizko ibilbidetik Santikurutze Kanpezuraino (33 km), eta bertan bazkaltzeko geldialdia egin dezakezu.

Antoñanatik pasatzean, ezinbesteko geldialdia egin behar duzu Vasco Navarro Trenbidearen Interpretazio Zentroa eta bertan gorde den trena bisitatzeko(38 km).

Segi Maezturako bidean (45 km), eta, nahi baduzu, aprobetxatu atseden hartu eta bazkaltzeko, Gasteizera iristeko falta zaizun 28 kilometroko tarteari ekin baino lehen.

Tarte laburra bada ere, lehen zatian, eta Zekuianoko tunela zeharkatu ondoren (inguruneko motibo eta soinuez dekoratu berri dute), Gereñuko Mendatea zeharkatu beharko duzu.

Mendate gogorra da, lasaitasuna eta zuhurtzia eskatzen duena, baina Laminoriako Tunel ia igaroezina (2.195 m) saihesteko aukera emango dizu; bizikletatik jaitsi beharko duzu harri landuen arteko pasabide estu hori gainditzeko. Pasabide horrexek adieraziko dizu mendatearen gailurrera iritsi zarela.

Kontu handiz ibili jaitsieraren lehen zatian, pago-baso zoragarri batean barrena. Urmael baten ondotik igaroko zara, eta bertatik, berriz ere, bide berdearen ibilbide zaharrean sartuko zara.

Errotaldeko Zentralak, Ullibarri Jauregin, Arabako Lautadarako ongietorria egiten dizu, jaitsiera leunean beti, Andolluko herri txikiraino (66 km).

Puntu horretan gomendatzen dizugu bidegurutzean eskuineko bidea hartzea Estibalizeraino (3,5 km), non aisialdi eta atsedenerako eremu batez gozatzeko aukera izango duzun, Andollurako bidera itzuli eta Gasteizerako noranzkoan jarraitu aurretik.

Aberasturiko eta Otazuko geltoki zaharrek Gasteiztik gertu —hots, proposatutako bidearen helmugatik gertu— zaudela emango dizute aditzera. 

Behin Euskadiko hiriburura iritsita, bisita ezazu, merezi du-eta. Hiri zoragarri horretako erdiguneko eta parte zaharreko kale lasai eta ederretan barrena ibilaldi bat egitea modu ezin hobea da zikloturismo-egun hauei amaiera emateko.

Bigarren egunean, Gasteiztik Bergara eta Oñatira bitarteko 47 kilometroak egitea proposatzen dizugu.

Vasco Navarro Trenbidearen Bide Berdearen jatorrizko bideari heltzen zaio berriz ere Gasteizko inguruetan, zehazkiago Gamarrako Industrialdean, Betoñuko Atearen eta Bergarako Atearen kaleen parean.

Beti iparralderantz, Duranako, Erretanako, Lukoko eta Urbinako herriak zeharkatzen ditu bideak, baita Legutioko geltoki eroria ere, Landako inguruetara iritsi arte (17 km).

Bertan, eguneko lehen geldialdia egin dezakezu, atseden hartzeko, janariz eta edariz hornitzeko, eta, uda partean, inguruneko hondartza artifizial zoragarrietan bainu txiki bat hartzeko.

Bide Berdeari ekingo diogu berriz ere Leintz Gatzagarantz, eta GI-627 (Arlaban Mendatea) errepidea hartu eta, kontu handiz, Eskoriatzara iritsi aurreko biribilguneraino jaitsi beharko duzu, eta hortik berriz ere bat egingo duzu bide berdearen jatorrizko bidearekin.

Hortik aurrera, eta Bergara eta Oñatiraino, bide berdeak aurrera jarraituko du, bidegorri bihurtutako jatorrizko ibilbidea eta zeharkatutako udalerrietako (Eskoriatza, Aretxabaleta eta Arrasate) hiri-tarteak txandakatuz.

Behin azken herri hori zeharkatu ondoren, San Prudentzioko bidegurutzera iritsiko zara (40 km), eta bertan Bergararako edo Oñatirako bidea hartuko duzu, zure helmugaren arabera, Vasco Navarro Trenbidearen Bide Berdearen azken helmugaraino.

KONTUAN HARTZEKOA

TÚNEL DE ARQUIJAS (1.415m.). Túnel iluminado. Se aconseja llevar luces.
TÚNEL DE ATAURI (300m.). Túnel iluminado. Se aconseja llevar luces.
TÚNEL DE ZEKUIANO-CICUJANO (350m.). Túnel iluminado. Se aconseja llevar luces.
PUERTO DE GEREÑU. Zona de dificultad alta.
VITORIA-GASTEIZ. Acceso entrando paralelos a la A-2130.
PUERTO DE ARLABAN > ESKORIATZA. Zona sin acondicionar. Acceso por GI-627.
SAN PRUDENCIO. Bifurcación dirección Oñati. 

GARRAIOA

Vitoria-Gasteiz > Estella-Lizarra > Vitoria-Gasteiz	www.araba.eus/alavabus
Vitoria-Gasteiz > Eibar > Vitoria-Gasteiz	www.pesa.net

TURISMOA

Tierra Estella-Lizarraldea Turismoa	www.turismotierraestella.com
Lizarraldeko Turismoa	www.estellaturismo.com
Kanpezuko-Arabako Mendialdeko Kuadrillako Turismoa	www.arabakomendialdea.com
Arraia-Maeztuko Turismoa	www.arraia-maeztu.eus
Arabako Lautadako Kuadrilla	www.arabakolautada.eus
Vitoria-Gasteizko Turismoa	www.vitoria-gasteiz.org
Gorbeialdeko Kuadrilla	www.gorbeialdekokuadrilla.eus
Debagoienako Turismoa	www.turismodebagoiena.eus
Bergarako Turismoa	www.bergaraturismo.eus
Oñatiko Turismoa	www.oñatiturismo.eus
Nafarroako Turismoa	www.visitnavarra.es
Euskadiko Turismoa	www.turismo.euskadi.eus

BESTELAKOAK

Vasco-Navarro Bide Berdearen Interpretazio Zentroa

www.turismo.euskadi.eus